مشكلتي وية بيت عمي

هلا امهاات
عندي مشكلةوياريت تساعدوني فيها..
مشكلتي هي وية بيت عمي..اني قاعدة في حجرة وحمام في بيت عمي عمي وعمتي مو مقصرين ويايي يعاملوني مثل بنتهم بس ساعات احسهم يتمادون في هالشي لدرجة اني اتضايق من حركاتهم ..في نفس الوقت اقول مادري هل من حقي اتضايق؟مادري اذا هالشي اللي يسوونه عادي بس اني اتضايق منه لاني خساسة!!
بقوليكم المواقف اللي مضايقتني طبعا هذي المواقف نقطة في بحر بقولها وانتون احكموا
واحد من هالمواقف كان وية عمي مرة كان يسألني عن شي ولما قلت ليه انه في الحجرة سيدة راح حجرتي عشان ياخده!!اكثر من مرة تكرر هالشي .هو حاط في باله انه مايبي يتعبني عشان جدي راح بروحه ..انزين دي حجرة نومي وبالنسبة ليي كلش غلط ان عمي يدخلها ..
وحماتي اول ما تزوجنا كانت عادي تدخل حجرتي وتقعد عالكمبيوتر في غيابي بدون ماتخبرني والقهر ان بيت عمي عندهم مفتاح سبير للحجرة يعني عمتي اذا تبي شي من الحجرة واحنا مو موجودين عادي عندها تفتحها بالمفتاح اللي عندها وتاخد هالشي..اني ما اقول انها على طول تسوي جدي لا بس للضرورة بس الغلط يظل غلط
احسهم يتصرفون في كل شي على كيفهم ولا كأن احنا متزوجين ولينا حياتنا الخاصة عمتي تدخل روحها في كل شي وفي كل شي لازم تبدي رايها تخيلو مرة شفتها حاطة نفس المخدة او مادري شسمونه بالضبط على الكرسي اللي في حجرتنا عشان يرتفع..انزين حتى لو كان هالشي في مصلحتنا بس ماظن ليها حق تتصرف على كيفها وبدون ماتقول ليي
يعني ترضون احد يدخل مكانكم واذا شاف شي مو عدل بالنسبة ليه سيدة يعدله بدون مايخبركم؟حتىلو كان هالتعديل في مصلحتكم

امهات هل من حقي اتحسس من هالتصرفات؟او انها عادية؟احس اني مو قادرة استحمل حركاتهم

الله يكون في عونش حبيبتي بس لااتسكتين عن هالموضوع لأن مهما يكون غرفة نومش تعتبر من الخصوصيات .



أقترح عليش اتخبرين زوجش انه يختلق أي عذر عشان ياخد منهم المفتاح السبير على الأقل مثلاً يقول ضاع أو أي شي .

ثاني شي أي وقت تطلعين من غرفتش قفليها على طول ولااتخلينها مفتوحة عشان يحسون بأنها خاصة .

أني في شقة ولاأخلي عيالي يدخلون غرفة النوم ( ممنوع ) .

ام نضالي
صارت سالفة بيني وبينهم ومنها عرفو اني اتضايق من هالشي وماقامو يدشون الحجرة نفس اول بس للاسف علاقتي وياهم مو نفس اول يعني هي زينة بس مو نفس قبل

انوار
قلت لزوجي عن المفتاح وهو يدري اني متضايقة من هالشي والحين اخد من عندهم هالمفتاح وحزة اللي اطلع صرت اقفل الحجرة بس مادري ليش احس تفكيرهم من النوع اللي اذا شافوني اقفل الحجرة يقولون اي مايبون احد يدش حجرتهم
يعني ما يدرون ان هالشي طبيعي!!

غزال
سالفة التدخل هذي قصتها قصة عندي في كل شي تدخل روحها والمشكلة انها زينة ويايي لابعد درجة تخاف عليي وماتبي تتعبني في شي بس مهما يكون هذي حياتي وهذي خصوصياتي كنت اتمنى انهم يفهمون هالشي بدون ماتصير حزازيات بيني وبينهم ..ساعات اقول بسكت وبصبر لانهم زينين ويايي بس ماقدرت كل شي وليه حد

الصراحه الله يساعدش


ماليش الا انتين اتقولين ليهم ان هالشي يضاااايقش


والله يوسع عليش وتطلعين بروحش

الله يساعدش اختي

ويكون في عونش

حتى عمش يدخل الغرفة : :

لو بس حماتش او عمتش يمكن اهون

ما عندي زود على الكلام الا قالوه البنات

تقريبا رايي مثل رايهم

:rty:

ولكنني سأبقى من المتابعين

وان شاء الله تتوصلين لحل يريحش ويرضيهم

المشكلة استحي اقول ليهم جدي يعني المفروض هم بروحهم يفهمون
واللي يخليني ما اقول هو انهم زينين ويايي عدل ويعاملوني احسن معاملة من جدي سكت عنهم
لكن نفس ماقلت صارت سالفة بينيوبينهم ومنها ما قامو يدشون الحجرة نفس اول

: :crying: : : :crying: : : :crying: :

هو شوفي لازم الوحدة تتضايق من اي تصرف يبدر من اهل الزوج

لو شنو كانوا بعد ما يكونون نفس بيت ابوش يعني

بس الواحد عليه يطنش وما عليه من شئ المهم تكونين مرتاحة من زوجش والباقي خلهم

يعني لازم هم يتكلمون والوحدة تاخد ساعات الكلام بحساسية شوي يعتمد على المزاج ههههه فيعني الواحد ليش يهتم عليه ينشغل باشياء ثانية ويطنشهم
كنت بقول تاخذين المفتاح او تخلين زوجش ياخذه بدون قصد بس دام قلتي انهم عرفوا وقاموا ما يدشون الغرفة فعادي يعني الحين المهم عرفوا غلطهم ...

والله يوسع عليش خيو

سلام الله يفتحها عليش وعلينا جميع خيو لازم تخلين حدود لمشكتش لازم تعالجينها على قولتهم نضرب الحديد وهو حامى قبل لا تتوسع اكثرالمشكلة وتوقفينهم عند حدهم حتى لو زعلوا يوم يومين وبيرضون والنهاية بترتاحين لان مو عدل فى الحجرة اسرار زوجية خصوصيات والله يساعد ش على حلها ان شاء الله

الله يساعدش صار لي موقف ولحد الحين اتصير لي نفس المواقف بس نفسش ما اقدر اقول شي ولو قلت زعلو وطلعوني اني الغلطانة وما اقول الله يكون بعوني وبعونش والبنات ماقصرو ا قالوا ووفو ا حاولي اتصارحينهم بس بطريقة احسن من شديوالله يرزقش ويرزقنا ببيت وتطلعين برة وترتاحين

الله يكون في عونج