التحرش,ارجوكم انصحوني؟

السلام عليكم
يااخوات انا عندي مشكلة
بس ماااقدر اقول لاحد,اخاف تصير مشاكل في العائلة ويمكن مااحد يصدقني

المشكلة هي ان جدي لامي يتحرش فيني بطريقة غير مباشرة بس مااحد ملاحظ هالشي لانه وايد يحبني ومهتم فيني
بس انا على الطاير فهمت قصده وحركاته انه قصده مو شريف وهالشي مو صدفة انه سوى هالحركة ...

احس انع يعشقني


دائما اتجاهله واحاول اترك المكان اللي يدخله

وهو دائما لما يدخل المكان اللي انا فيه يوقف يتاملني ويناظرني وانا اسوي نفسي مااشوفه
ويجي لي الا غصب شوفيني وعطيني نظرة

صدقوني صرت اكرهه واكره طاريه حتى
ولو اقول لابوي بيسوي لنا مشاكل في العائلة
ولو اقول لامي بتقول لي اني اكذب واتوهم ومابترضى على ابوها

قولوا لي وش الحل؟؟؟
ارجوكم

اللهم صل على محمد وآل محمد

أخت الحنونه .. مشكلتش غريبه بصراحه

لاني انصدمت من الجد المراهق ...


بس ليش لااا ... هالدنيااا كل شي فيها جايز



ونصيحتي لج انج تتخذي من أمج كالأخت او الصديقه

حسسيهاا باللي تشعرين فيه ... كلميهاااا .... واجهيهااا

وأكيد أمش بتخاف عليييج وراح تتفهم لج

ولو مثلا عارضت وماعطت هالموضوع اي أهميه

خبريها انش بتكلين ابووووج .. عالأقل يتصرف

المشكلة انهم ملاحظين اني مااحبه بس هم يعتقدوا اني كله كدا مع كل الرجال
دايم ماعطيهم وجه ورزينة ورزة
واصلا انا محتشمة ومافيني شي يجذب عشان اعذره حتى خواتي وبنات خالاتي يلبسوا لبس مو محتشم
بس هو مايشوف الا انا مع اني دايما محتشمة
وصرت اخاف اخلع حجابي في بيت جدي مع ان محرم علي وعادي بس تعرفون ليش ..
حتى مااكلمه ولا اسلم عليه عشان لاالفت انتباهه
أنا مادري وش اسوي ابي احل مع انه هو ماتجاوز حدوده لانه يعرف اني يمكن اذبحه واصفقه باي شي
اخاف اني اكتم واكتم لين اثور واتهور ويمكن اذبحه (اتقي شر الحليم اذا غضب)
وانا بعد اخاف اني اظلمه مع انه ساعات مايسوي شي بس لازم يجي لي ويتامل في جمالي وهدوؤي

ويسوي نفسه مهتم اذا شافني واقفة يقول لي استريحي او يجيب لي فاكهه او شراب او اي شي بس يحاول يكلمني
ويقترب مني وانا بس اشوفه احاول اتحجج واطلع من المكان او اروح الحمام او المطبخ او غرفة ثانية

و دائما يجي يجلس بجنبي ويحاول يلمس فخذي او يمسك جوالي ويحطه على فخذي او بين فخذي ويلمس رجولي
وبعد مرة كنت في غرفته حاطة ثيابي رحت اخذهم بروح ابدل في الحمام وقال لي بدلي ثيابك هنا
بس انا سويت نفسي ماسمعته لاني انصدمت ولا عرفت شلون اتصرفت المفروض ارد عليه واسبه بس انا مو من هالنوع
لاني انسانة محترمة واحترم اللي اكبر مني وماابي اسوي مشاكل واخاف لو قلت لامي تقول لي انتي تتحججين عشان ماتروحين معنا بيت جدك لاني مااحب اروح هناك وانا مشكلتي اني استحي

نسيت اقول لكم ان جدي ارمل وماتزوج بعد وفاة جدتي
وخالاتي كم مرة حاولوا يخطبوا له بس ماصار له نصيب
وهو شال فكرة الزواج من راسه
انا اقول يمكن انا اذكره بجدتي وهو مايفهم هو وش قاعد يسوي
بس مهما يكون ماله حق يسوي كدا
وهو انسان مؤمن ومايفوت فرض
لاتقولوا لي انا مكبرة الموضوع انتوا تخيلوا الموقف
جدك يتحرش فيك!!!

الله يساعدك اختي

وهذا يصير حتى في احسن العائلات

شوفي لا تروحين بيت جدك تحجججي بالدراسه وله اي شي وخلي احد من اخوانك يضل معاكي في البيت
وإذا امج قالت لج لا لازم قولي ما احب اطلع يمه ،،

وإذا الحت انتظري فتره من الزمن وقولي لها يمه ابي اسولف معاج بس ابيج تسمعيني بقلبج قبل اذونج واكيد راح تفتح قلبها لج

وحتى لو كبر الموضوع اختي اهم شي انتي

والله ييسر لك الزوج الصالح يا رب وتنتهى هذي المشكله

اشكركم على ردودكم بنونة وعنوني
بس ليش مافي الا ردين والمشاهدات فوق الاربعين
هل المشكلة معقدة الى هذه الدرجة
انا توقعت انكم كلكم بتساعدوني
انا مااقدر اظل في البيت واتحجج بالدراسة لاني مخلصة دراسة وفاضية ومااطلع من البيت كثير
وصديقاتي مايقدروا يجوني لانهم مشغولين ويبون يروحوا لقرايبهم وانا ماعندي صديقات وايد
وخواتي واخوتي كلهم يروحوا بيت جدي ويحبون يروحوا هناك وانا لازم اروح معهم على مضض
وانا بعد اشتاق الى خالاتي وخوالي وبنات خالاتي
بس من يحضر جدي احس انه الشيطان جاي
وامي مستحيل تفهمني وابوي متاكده انه بيصدقني لكن بيسوي مشكلة
وهي انه بيمنعنا كلنا نروح بيت جدي وبيروح هو بنفسه وبيتهاوش مع جدي ويمكن يطقه
وبعدين كل العائلة الكريمة بتحقد علي

بسم الله الرحمن الرحيم

السلام عليكم ورحمة الله وبركاته

اختي اني قرأت مشكلتش ولكن لم يسعني الوقت للرد عليك

وها انذا قد عدت من جديد لاطرح وجهة نظري بالموضوع

..........

بصراحة عدم ذهابش الى بيت جدش ليس حل للمشكلة وانما هو هروب

وانا لا انصحك بالهروب بل انصحك بالمواجهة

....

حاولي دايما اذا كان جدش موجود انش تتواجدين مع امش او يكون احد بينكم

وعلى حسب كلامش ان البيت ما يختلي

فانتون تروحون كلكم

يعني كوني دايما مجتمعه وياااهم

...........

واذا جدش في يوم من الايام سوى ليش حركة

حاولي تعطينه كلمتين توقفه عند حده

علشان لا يتجرأ عليش مرة ثانية وقولي ليه انش رح تخبرين ابوش

واذا كلش ما تقدرين تقولين لامش قولي لابوش

واذا لا هذا ولا هذا خبري اخواتش

يمكن تكون عندهم جرأة انهم يكلمونه

........

الظاهر ان جدش عايش في فراغ عاطفي كبيير

فالاحسن ان تدورون له على مرة

...........

عندي اقتراح ليش بعد بس ما احس انه حل للمشكلة ..

ليش ما تدرسين في معهد او تشتغلين علشان تملين وقت فراغش وتنشغلين

ويكون اليوم الا تروحون فيه بيت جدش انتي تكونين بالدوام فما تتلاقين وياه واجد

........

اتمنى تنحل مشكلتش باقرب وقت

خبرينا بالتطورات ...

مشكورة فداء الحسين على ردك واهتمامك بمشكلتي
يعطيك العافية ومعك حق في كلامك.

انا هذا اللي دائما اسويه مااقعد بروحي ومااخلي مجال جنبي ومن اشوفه يدخل مكان احاول اطلع بسرعه
دائما اجلس بين احد من خالاتي او خواتي بس ساعات يكون في مجال او ساعات يجي يجلس قدامي
وانا دائما اصد عنه واسوي نفسي مشغولة بشي من التلفزيون او الجوال او السوالف او اي شي
ودائما اسوي نفسه مو شايفته قدامي ولا ابتسم له حتى
باقول لك موقف صار لاختي:
اختي مرة انتقدت كلام جدي وقالت عنه مخرف قدام امي وامي عصبت على اختي يعني هذا بس على كلام وعصبت كدا وقالت لها مايصير تقولين عنه ومدري شنو يعني قامت تدافع عن ابوها
شلون لو اقول لها شنو يسوي ؟
بتقول لي انتي تبالغين هالشي عادي شفيها لو جدك جلس جنبك ومزح معك ومابتصدقني لانه ماترضى على ابوها
ولو اقول لاختي الكبيرة عن المشكلة بتنشر الخبر في المنطقة كلها لانها ماتمسك لسانها
وانا ماامبه افضح احد الله يستر على الجميع
وبالنسبة للدراسة او اني في هاليوم مااروح بيت جدي مااقدر لاني اشتاق الى خالاتي وبنات خالاتي وزوجات خيلاني
يعني مايصير اغيب عنهم واقطع الصلة.

جدي اصلا دائما يجلس جنبنا و ويستظرف حاله بس انا لما يجلس جنبي احسه يتصرف بخباثة ويحاول ياكلني بعيونه مع اني محتشمة حدي ولا اتدلع ,يعني ليش مايروح الا لي انا مايشوف الباقي اللي لابسين عاري !

اصلا هو خلاص مايبي يتزوج ولا احد يبيه الصراحة لانه مايقدر يفتح بيت جديد وماإلى ذلك ....

انتوا ادعوا لي بالفرج وبالزوج الصالح عشان افتك من جدي وسخافته ويفهم ان انا عندي زوج وزوجي بس اللي بيلمسني لوحده...

راح ابلغكم بالتطورات اللي تصير

طيب انا عندي سؤالين وياريت تجاوبوني بصراحة:
1-إذا قلت لامي أو ابوي وش بيسوون وشو الحل اللي بيسووه لهالمشكلة برايكم ؟انا قلت لكم الشي اللي اتوقعه من ردة فعل ابوي بس انتوا ليش تلحون ان اقول لامي او ابوي قولوا لي انا اسوي الحل يمكن اقدر
2-هل انا أبالغ في ردة فعلي او معي حق في موقفي ؟

جاوبوني ضروري

سلام والله عورتين قلبى يالحنونة
بس هالامور ما ينسكت عليها اللى يسوى شدى يعنى بيسوى الاكبر من شدى
نقطع الحديد وهو حامى
لازم تخبرين امش حتى لو ما صدقتش بيكون الموضوع فى مخها لان مو شى سهل
وبتلاحظ ليش لان رجال كبير وناس يخرفون فى هلسوالف نفس المراهقين يا دافع البلاء
بس خيو لا تسكتين عشان ما تتوسع المشكلة اللى بتخافين منه يصير خله يصير فى النهاية كل واحد بيعرف حدوده وبترتاحين

اختي الحنونة مثل ما قالت لش ام زهراء

انتي الا عليش انش تخبرين امش حتى لو هاوشتش رح يكون الموضوع في بالها على طول

وراح تلاحظ هالشي وتشدد المراقبة على ابوها وتلتفت ليش اكثر

فانتي الا عليش سويتينه

مو بعدين اذا صار شي لا سمح الله يقولون لش ليش ما قلتين لنا من البداية

,,,,,,,,,,,,,,,

الله يساعدش يا اختي
نصيحتي افتحي قلبج الى امج وخبريها يمكن تحصلين عندها الحل

السلام عليكم

مدري وش اقول لكم
امي ماقلت لها مااقدر ولا قلت لابوي
انا قلت لاختي الكبيرة وفي البداية ماصدقتني تقول لي عادي مافيها شي بس بعدين اقتنعت
واختي قالت الى اكبر خالاتي(حسبت امي) وخالتي صدقتها ولاحظت هالشي بس تقول:

وش تبينا نسوي يعني تبيني اروح اطق ابوي؟ او اهزءه هذا رجال كبير!!!! ابوي مااقدر اقول له شي !
وقالت لي اياني وياش احد يدري بهالسالفة وقالت لي اسوي مثل ماقلتوا لي ان مااقعد بروحي واقعد جنبهم ولااعطيه مجال.....
تقول بتدور له على مره وللحين ماصار شي والحال على حطته
وانا للحين لايعه جبدي منه وصارت عندي ازمة نفسية وكوابيس


بس حبيت اطمنكم وابلغكم بالتطورات عشان لاتحاتون
والحمدلله على كل حال ومشكورين على اهتمامكم

الله يساعدش خيوو

وخل يشتغلون على الموضوع بسرعه ويدورون له مرة

وان شاء الله اذا عرس يعقل والله يهديه