طفلي والاهل؟!!!

موضوع: طفلي والاهل؟!!! الجمعة 20 مارس 2009, 9:49 pm

سلاااام عليكم جميعااا
شخبااركم جميعاا؟

حبيت اطرح مشكلتي يمكن الاقي لهاا حل عندكم اخوااتي لانهااا فعلا مضايقتني وااااااااجد

بسم الله الرحمن الرحيم ابدا

اولاا :انا ام لولدين الكبير 6 سنواات تقريبا والثاني 3 سنوات وشهرين عايشه ببيت عايله (البيت العود ) وهذا البيت مكون من اربع بيوت تقريبا وانا سااكنه بشقه في واحد من هذي لبيوت وكلهم لزق ببعض

طبعاا مشكلتي هذي صار لهاا 3 سنواات تقريبا مع ولدي لكبير ((قاسم ) 6 سنوات ))..
ما طول عليكم اخوااتي .. بيت عمي (اهل زوجي) كلش ما يحبون جهاال وفوضه وحركه ووووالخ واصغر بنت عندهم كاان في ذاك الوقت عمرهااا 11 سنه وهادئه .. وطبعا مثل العادة كل بيت ليهم يوم يتجمعون فيه وبيت عمي يتجمعون يوم الجمعه وتجي حمااتي الكبيرة بعمري وحمااتي الا اصغر وحمااي ومعاهم اطفالهم .. واحنا ننزل بما انه شقتنا فوق معاهم .. وطبعاا اطفاال ومن سن بعض تقريبا ومتجمعين شتتوقعون انهم يسسون ؟!! اكييد فوضى وصريخ واحيانا قليله هوااش وركيض وطلعه ودخله خصوصا يحبون بعض وما يشوفون بعض الا يوم واحد بالاسبوع !!

في يوم من الايام صار ت الجمعه يوم الجمعه كالمعتاد وكانت اخر جمعه بشهر صفر وصارت الفوضه مثل العادة عاد هني عمي وعمتي وحموااتي لصغاار 3 حموااتي بالبيت عايشين تنرفزوو على الجهااال وقالو لهم اطلعوو برى البيت على البااب لعبوو وصارخوو براحتكم وفعلا طلعوو وهدء البيت شوي اني رحت اشرب مااي برجعتي اسمع حمااتي الكبيرة تقول الى خوااتهاا اني ماخذه قنااع الى يوم تاسع من ربيع وطبعا الكل يعرف شيسوون بيوم تاسع يلبسوون اقنعه ويتنكروون ومااعرف ايش ..المهم..

قالت اسبوع الجااي بجيبه وبخوفهم فيه وبشوف يقعدون لو لااا وطبعاا عندهااا ذاك الوقت 3 اطفاال وصغاار بعمر ولدي قاسم تقريبا واحد اكبر بسنه والثانياصغر بسنه ..اني طبعاا اول شي ما ستوعبت الكلااام وما عطيت الموضوع اهميه بالمرى

عدى اليوم على خير وجاى الاسبوع الا وراه يوم الجمعه ومثل العادة ولدي ينزل من يسمع اصوات اولاد عمته ذاك اليوم هو نزل قبل ما هم يجوون وقعد تحت واني وياااه .. وفجئه واحنا قاعدين بالصاله دخلت وحده عليهااا بوشيه (( وجهها مغطى )) وعليها عباية راااس وهي سااكته وعلى طوول للمطبخ احنا هني تفاجئنا ومستغربين مني هذي وليش داخله لااحم ولا دستور والكل مستغرب قامت عمتى ام زوجي ودخلت المطبخ وراهااا وردت رجعت الصاله وهي مبتسمة احنا هني اخذنا الفضول اني وحمااتي الصغيره وقاسم مرى وحده طلعت من المطبخ ورفعت البوشيه من عليهاااا تخيلوووو ؟؟؟!!

كانت لابسه قناع مخيييف جداا جداا جداا لدرجة اني اني خفت وقعدت اصرخ حدددددددددددي وقسوم على عمري يصرخ وياااايي وحملته واناااطط ابه على الكنب واني اصرخ وهو يصرخ وحمااتي بعد اول شي قعدت تصرخ وبعدين سكتت وعمتي تضحك وعااادي الموقف عندهاااا طبعااا اني اول شي قعدت اصرخ ومن استوعبت السالفه سكت بس قسووم على عمري مااا سكت ظل خااش وجهه بصدري ومجودني بالايد ولرجوول واني حاملتنه واهي جااايه له تقول له بعد بتعاااند وبتسوي وبتسوي !! وهو مو في دنيا من الخوووووووف والرعب !!

مديت ايدي وشلت القناع من عليهاااا واني حدي موصله من الحمق عليهااااا .. يعني اللحين شنو ردة فعل ولدي من هالزهقه الا سوتهاااا فيه مو يخاااف طوول الوقت ؟!!

فعلا ظل خاايف طوول الوقت وخااش وجه فيني حتى اني حااولت اقول له ان هذي عمتك وشوفهااا ووريته القنااع وشلون يلبسونه وجذي واهوو ابد خااايف ..لان طريقتهاا فعلا تخزف حتى الكبير مو شي سهل !!

المهم ظلت عقدة الخوف من الاقنعه ويااه ايااام وايااام واني احااول افهمة واعلمة شنو هذا لدرجة اني شتريت له وااحد مال صغاار ورق على شكل ارنب وحااولت افهمة بس للاسف لا حياة لمن تنادي ظل خااايف واستمر وييااه الخوف والله العظيم يخااف يصير بروحه ويخااف يدخل الحماام وانتو بكراامة روحه ينام بروحه ينزل بروحه على طوول لازق فيني !!

وظلت كل جمعه من تجي تجيبه ويااهااا وما طلعه جداامي .. والمصيبه ان اولادهااا يخاافون منه شلون قلبهاا يطاوعهاا تسوي جذي ماادري ويوم الا خوفت ولدي قالت الى ابوهم (زوجهاا )) خل الجهااال اذا سويت لك رنه خلهم يدخلون البيت!! ليش يعني حتى لا يخاافون يوم انهاا ما ترضى على اولادهاا ليش تخوف اولااد الناس !!

المهم .. ظلت من يقوم او يسوي شي تقول له بجيب لك القناع الى ان بيت عمي ظل يهددونه بهالقنااع بعد يعني عمتي من تبيه يسوي شي او وحده من حموااتي وما يرضى على طوول يقولون له بنجيب لك القنااع !! وحااولت ويااهم ان ما يخوفونه بالطيب وكلمتهم بس للاسف ما سمعوني وما خلوو ليي اعتباار وظل يخااف من كل شي الى درجه انه يخااف من عبايتي لما تكون معلقه بشمااعه يقول ماما شيليهاا اخااف يجيي ليي القناع منهااا لان عمته كانت لابسه عبايه !!

للمشكله بقيه!!

بربـــــــــــــــ

اني قريت المووضوع والصراحه جتني حره على الياهل

اني لو منش ما اسكت ليها

وله بعد اليوم انزل وياهم

ما يصير جديه يصير تعاملها من الطفل ،، إذا اهيه ويه عيالها جديه تنجاز هذا اسلوبها وهذا مستوها في التعليم

اهم شي ولدش خيو ما تسوى عليه حاله

واني متابعه لش خيو كملي

باااااك

نكمل

المهم : بعد سنه يوم تاسع من ربيع قالت ليي امي اخذيه وروحي راويه الناس في الشارع لانهم كاانوو لابسين اقنعه ومتنكرين وزمارات واللعاب ناريه ومااعرف ايش قول يمكن شوي يستانس ويروح الخوف اذا شاف الجهال لابسين !! المهم حملته هو اخوه اني وابوه ورحنا ويااهاا وبس شااف اول وااحد لابس قناع فزع الدنيا من الصريخ وما رضي يسكت الا يوم رجعنا به البيت !!

وظل يخاااااف وما يفارقنا ولا دقيقه وهم لازاالو يخوفونه بالقناااع !!<<بيت عمي .. اخر شي قلت لهم بالطيب وظلو يضحكون عليي لان اقول ليهم انه يخااف وما يناام في الليل وكل يتزهق وجذي وهم ولا على بالهم يضحكون واخر شي عصبت على الكل والجميع وقلت لهم في ذمتة الا يخوف ولدي بالقنااع سواء بالكلاام او غيره حراااااااااااااام عليه !!

ولاكن كأني انفخ في جربه مبطوطه

والسنه نفس الشي صاادره يوم تاسع بس هني احنا ما طلعناهه لاا ابوه كان رايح ويااه يجيب عشى وبالصدفه شافهم ..وظل طوووووووول الوقت وهو خااايف من كل شي !! وفي الليل ناام من وقت على غير عادته من الخووف وخليته على فراشه وفي الليل قعد ومرى وحده قاام يصرخ اخاااف اخااااف!! فزيت من النوووم مرعوبه حدي من صريخه واخذته بحضني شربته ماااي وسميت عليه بسم الله وخليته وياايي بسرير يناام جنبي .. وظل طوول الليل هو يتزهق وكل شوي يقعد من نومته الى ان طلعت الشمس وقاام يقول ليي ماما ابي اروح اشغل التلزيون اكي طلعت الشمس !! والله من الخوف يبي يسمع اي صوت يسههيه عن خووفه !!

وقمت طلعت ويااه حطيت راسي على الكنب وغفت عيوني شوي عنه وهو قاعد بحضني وما لتفت له الا يصيح بالعدااااااال !! اقول له شفيك ماما يقول ليي انتين نمتين عني !! وانا اخااااف وهو دموعه اربع اربع على خدة على عمري .. والله كسر خاااطري قمت وسويت ليي كوفي حتى بس اصحصح ويااه وبعدهاا قعدت ابوه يقعد ويااه حتى اغفي اني شوي

وظل كل ليله يقعد يبي يجي وياايي على السرير لانه يخااف في ليله من الليالي قعد وقلت له تعاال وياايي على السرير وابوه كان نااايم وجى جنبي ونمنا ومرى وحده ما سمعت ابوه الا يقول له قوم روح على فراااشك ونااام وهو يقول له اخااف وهو يوقل له ليش تخاااف ما في شي يخووف وقوم على فراشك !! مسكين قااااام على فراشه وهو يصيح بسكووت على عمري كسر خااطري حده واني هني قعدت الا يقول ليي ماما طالعيني على ماانااام لاني اخااااف : :crying: : وفعلا ظليت اطالع على ما غفت عيونه والله العظيم من غفت عيونه ظل يرتجف جسمة كله من الخوف هو فيه نوومة بس يخااف يغمض عيونه من الخووف : :crying: : اني هني ما قدرت قمت وقعدته وشربته مااي ورديت ركبته وياااي على السرير وابوه استحرق عليي عده بس قلت له لاااااااااااا مستحيل اخلي ولدي جذي يناام وهو ميت من الخووووف والرعب وشال مخته ولحااف قاسم وطلع برى الغرفه ينااااام !!

قلت اي ماعليه انت ناااام بعيد عني ولا يناام ولدي وهو مرعوب وبعيد عني خخخخخخ

والى يومكم هذا هو يخااااف ومرعووب

واليوم ولد عم ابوه اكبر منه بسنه .. جاايب وااحد البيت يخوفه وجيي ركيييييييييض فوق يشتكي عليه ان محمود طلع الوجه ليي وعلى طوول اروح له بيتهم الا امة تقول ليي اني قلت له يروح يخوف اولاد حمااتش !! قلت ليهاا بس انتين تدين ان ولادي يخاافون من هالسوالف ومشااكل صايدتنا منهاااا تقول ليي اني ما قلت له يروح الى اولادش اقول ليهاا زين تدرين ان اولادي ويه اولاد حمااااتي يعني اكييد بشوفون وبيخاافون واني مو نااقصه !! وابد تضحك ولااااااااااهمنهااا شي !! والله نااس قلوبهم حجر يمكن الحجر يلين وقلوبهم ما تلين ..

طبعا تتسألون وين المشكله ؟!!

واللموضوع بقيه

بربــــــــــــــــــ

بااااااااك

طبعاا تتسالون وين المشكله

المشكله :-
ان ولدي الى يومكم يخااف من كل شي ومستحيل ينام واو يدخا حماام وانتو بكرامة او يتنقل بالبيت بروحه !!

والمشكله الثانيه ان انتقلت العدوه الى اخوة الصغير فبدل ما كنت بواحد صرت بثنين !!

بتقولون

ليش ما تطلعين من بيت عمش بشقه اجاااار ؟!!
زوجي يرفض وبقوة انه يطلع من بيت ابوه مع انه اخوه الكبير بشقه برى البيت واخوة الصغير بعد بيطلع بشقه برى البيت

وفي مرى من المرات وكنت حاامل بولد الصغير صارت مشكله بعد على سالفه انهم يخوفون ولدي (اهله) ورحت بيت ابويي وقررنا ان انحل المشكله بينا انا وزوجي ونطلع بشقه اجاار .. بس لا تاتي الرياح بما تشتهي السفن !! جى عمي بيت اوبيي وكلمنا انا وزوجي جداام ابويي وقال لينا لا ما يصير تطلعون وهذي اسبااب تافهه ومن يصير تخلون مكانكم فاضي وانا ما استغني عنكم ومن هالكلاام العسل الى ان زوجي وبكل سهوله واافق على انه ما يترك بيت ابوه ولو ان عمي فعلا يحب زوجي واكثر وااحد في عيااله يحبوه هوو وبشهادتهم بعد بس هذا مو على حسااب راحتى وراحت اولادي المهم محد اكلهاا غيرييي

وبعد بتقولون ليش ما تروحين بيت اوبش يوم الجمعه بما انهم ما يجون الا يوم الجمعه ؟!!
بعد اقول ليمن ان زوجي ما يرضى اروح لان اروح يوم الخميس لان نتجمع ويه اخوااني في بيت ابويي يوم الخميس ويوم الجمعه تصير التجمع ببيت ابويي العود بس هو ما يرضى اروح واذا بروح اروح بدون اولادي هذا شرطه !! يعني تيتي تيتي لا رحتي ولا اجيتي !! شلفايده اروح بدون عيالي وانا الا ابي اروح عشان اولادي !! يقول لا ما يصير تاخذينهم لان هم يحبون اولاد عمتهم وما يشوفونهم الا يوم الجمعه

فضطريت اني ارضى واقعد واظل طووول اليوم اراقبهم من بعيد لاني ماانزل بيت عمي اللحين بس الجهال الا ينزلون واي صرخه او اي شي على طووووووول اروح ليهم ركيييييييييييض

هذي مشكلتي وياريت احصل ليهاا حل عندكم

والسموحه منكم خوااتي على ا لاطاله في الموضوع

تحيــــــــــ ام عسوول ــــــــــاتي

ام عسول حبيبتي
عندش حل انش اذا شفتينهم مطلعين القناع خديه وقصصيه
بالقص نتفه نتفه
بتقولين ما ليي حق بقولش بلا الاما يحط لش حساب ولا اعتبار
ويش يسوين له كل شي ولا اولادش
او ما تنزلين بالمره تحت وخبري زوجشيكلم اخته بالطيب
واذا ما صار اعتكفوا في شقتكم
اني ما اييد طلوعش من الشقه تروحين تدفعين وندش وحده ببلاش
بس انتين حلي الموضوع بلطيب وادا ما فاد بالقوه شنو لعبه
واما عن قسومي حاولي انش تفهمينه ان هذا مجرد وجه ازرعي
فيه الشجاعه
خدي له اقنعه وراويه وفهميه ان ما في شي من هالنوع اللي يخوف
وان اني وياك والله يحميك ووووووووووو
وان شاء الله تنتفعين

الصراحة خيو الله يساعدش

اني صارت داخل قلبي حره وغليان
بس اذا ماسمعو منش ليش ماتفهمين زوجش وضع ولدش وهو يشوفه بعيونة
انه يكلمهم ويمكن ياخدون كلامه بجدية غير عنش
خيو لانه كللش مو زين سن ولدش 6 سنوات يعني الخوف بلازمة لين يكبر وهذا مو زين له
حاولي تفهمين زوجش يكلمهم بالطيب
والله يكون بعونش

هلااااااا ام عسوووووووول الله يساااااااعدش على المشكلة اللي انتين فيها

بس حاولي ام عسول انك تشترين قنااع وتلبسين انتنين وتسووووين نفس الطريقة والبسي وراوياه وخلي يجود وجهك علشااان يروووووح الخووف وراويه قولي ليه حتى في عيد ميلاااااد يلبسوووون قناااع وخلي هو يلبسه وراوي شكله واضحكي عليه انتين وابووووه وقولي ليه بلبس قنااااع في عيد ميلاادك علشان تصير مثل سبايدر مان وتصير قووووووي وقولي ليه سبايدر مان يلبس قنااااااااع وصاار قوي وحاولي تراااوين فيلم حسسسيه باي طريقه ان هالقناااااع نفس لعبة وانت كبييييير ماتخااااف من قناااااااااااع وحاولي انتين وابووه لان طرف واااحد مايفيد وخلي خالته يساااعدونه ان يضحكون لين شافوا القناااااع ولبسسيها هوووووو وقوموا ضحكوا عليه واتمنى الحل تستفيدين منه

أعوذ بالله من الشيطااان الرجيم .... وش هالأدميه عليها قلب مثل الحجر

والله اني اقرا واني معصبه علييييهم بفعلتهم الشنيعه

وأني رايي مثل الاخت ندوي نج تقصصين القناع نتفه نتفه واللي فيه خير يتكلم ردي عليه اني مابغي مشاكل ولا عوار راس ... قول لي لهم سببتون لولدي عقده خووووف وحسبي الله ونعم الوكيل فيكم .. والله قوليها بصوت عال وكل شوي تحسبي فيهم واللي ياذي ولدج

ونصيحه لا تضعفين من هالناحيه ولاتفكرين تطلعين بشقه أجاااار و قعدي مكانج وانتي معززه

الحين الاهم بالمشكلع شلووون يروووح هالخووف من نفس ولادج .... والحل اللي عندي يختلف عن بقيه البنااااات .. وللحين ما اقتنعت انج تعالجين المشكله بنفس الخطأ وهو القناااع

الحل اللي عندي وهو الافضل انج تتصلين او تروحين حق شييييخ واذا تبغين ((( رقم شيخ بعطيييج )))

وتقولين له عن ولدج ومشكله الخووووف اللي عنده ... وبيعطيييج بعض الايات القرآنيه تقرينهم عليه يومياااا وتقرين بماااااي وتشربينه ووبعد تسووين ليه حجااااب فيه آيات قرآنيه وتخلينه بسريره

الحل الثاني انج تعرضينه على اخصائيه نفسيه أطفال عشااان مشكله الخوف

وماعليه شر ولدج خيووووه وربي يحميه من كل شر يااارب

هلا ام عسولة ..شخبارش وحشتيناا..

طبعا البنات كلهم ماقصروا في الحلول .. بس بغيت اضيف نقطة بسيطة ..

اني عندي الحل الوحيد انش يوم الجمعة تحاولين تقنعين زوجش بقدر الامكان انش ماتقعدين في البيت ..
المكان الي يجي منة المشاكل روح بعيد عنة وانتة سالم ..على الاقل عشان راحتش النفسية وراحة عيالة وطبعا انتون( اعزماعندة) لازم يتنازل عن اصرارة انكم تضلون في البيت ..

هدا مو معناتة انش تهجرينهم خير شر ..لااا طبعا يعني تخصصين لش مثلا يوم في الشهر يعني مثلا جمعيتين او ثلاث جمعيات تروحين بيت اهلش ويوم جمعة في الشهر تقعدين فيه في البيت عشان عيالش يشوفون عيال عمهم ..وانتين تشوفين حمواتش ..وترضين زوجش من ناحية اهلة ..

وماعليه شرقسومي القمر ..

وبالتوفيق خيوو ..

اني اؤيد كلام بنونة وديه لاخصائية علاج نفسي احسن عشان يكوون شجاع ويتغلب على الخووف اللي عنده والله يكون في عونش يا ام عسوول

مشكورين اخواااتي على اهتماامكم بالموضوع
الصرااحه حسيتكم مهتمين وما قصرتون بلحلول
ندوي
حااولت اني اخذه بس ما قدرت عليهااا لان حمااي وقف بصفهااا ويبعدهاا عني حتى مااخذه وتدرين حراام لمس حمااي وللعلم اني معصبه وبعد شوي واصيح وهم اثنينهم (حماي وحماتي ) يضحكون ولا على بالهم وزوجي للاسف ما كان موجود بالبيت .. والمشكله انهم ما خذينهاا عن مزحه واني عن جد

وترى خيوو من حقي اني اخذه واقطعه .. والدليل اني وهم يتغدون دخلت الغرفه بدون محد يشوفني ورحت ادوره حتى في شنطة حمااتي مالت ثياب اولادهااا بس ما حصلته !!

يمكن تقولون ان الا سويته ما يجوز (( اني اتعبثباغراض غيري )) بس ولدي اهم من اي شي !!

بنت البلد

مشكورة خيوو على مرورج بالموضوع

والصراحه ان زوجي عنده الموضوع عااااااادي جداا ان طفل بسن قسوم يخاااف سواء بالليل او النهاار !!

وكذا مرى اقعد ويااه واكلمة واقول له ان قاسم ما صادته عقدة الخوف الا من اختك وتخويفهاا له بس المشكله ان دااايما يتعارض ويااي بهذي السالفه ويقول انهم يخوفون الجهال كلهم ليش يعني بس اهو الا يخااف !! يعني مو هو((تخويفهم )) السبب !!

وللعلم مرى من المراات ومن كثر ما حرتني نومة الليل .. اصريت عليه ان ينزل ويااايي وكلمهم وكان الصبح وما كاان في الا عمتي وحمااتي الكبيره ودت عيالهاا الروضه والمدرسه وشرفت البيت وحمااي وحمااتي الاصغر بعد .. وفعلا نزلنا وكلمتهم بكل طييب وفي منتهى الادب !!

بس النتيجه ان عمتي قالت ان هو اقل شي يخااف منه اللحين ماردت الا على القناع !!

وحمااتي الكبيره توافقهاا الكلاامهااا وكانهم متفقين !!

اما حمااي كلمته الا على طوول يرددها على مسامعي انش انتين مدللتنه واااااااااااااجد وزياده عن اللزوم وهو الا سواه جبااان!! يعني مو القناع والطريقه الا دخلت فيهاا اختته !!

اما حمااتي الاصغر فهي استحرقت وقامت وهي تصرخ وتقول اني مااخوفت احد ولا تجمعين بكلامش مع انهااا من ضمنهم !!

وزوجي هني قال لهم لا تجيبون طااريه بالمرى بالبيت وخلااص اي شي يسوونه الجهال نادوني وانا اتصرف ويااهم !! بس هذا الكلاام الا قاله .. حتى اني اقول له قول ليهم شيصير بالليل اذا جينا بناام .. يقول اي جاهل يخاف بالليل !!

يعني بمعنى اصح ان الكلاام في هالموضوع ضاااااااااااايع ويه الكل والجميع

لان بيت عمى مااعندهم شي اسمة جد حياتهم عايشينهاا مزح بمزح لدرجة انهم يغلطون على الشخص وعندهم مزحه !!!!!!!!!!!!!!

ام سيد محمد
مشكورة بعد عمري وما قصرتين خيوو

وفعلا سويت مثل الا قلتينه وشريت قناع اطفاال على شكل ارنب انا البسه وعادي عنده يقول انا مااخااف من هذا اخااف من قناع عموو وعنده اقنعة سبايدر ماان وبات ماان وزورو بعد بس مستحيل اجيب البيت قنااع مرعب مثل الا عند عمته اخااف يصيده شي لا سمح الله وبعدهاا اندم لانه يخاااف موووووووووت .. الى درجه ان بيت ابويي جنب بيتهم براده مرى امي رايحه ويااه ما شافته الا يصرخ وطلع برى البراده يبي يرجع البيت امي استغربت منه وخلت الا بيدهااا وراحت وراه الا يقول ليهااا شفت قناع معلق بالبرادة !! والله العظيم ظل فترى طووووووووووويله ما يرضى يدخل البراده مع ان القنااع قلنا الى راعي البراده يشيله وشاله !! بس بعد ما يرضى يروح بس اللحين الحمد لله قام يروح ويه اخوااني واختي .. وبعد القبائل موته وحياته القبائل ومرى من المرات بعد التفت الى قنااع معلق ومنهاااا ما يرضى يروح !!

لان في اشكااال فعلا مرعبه الى لكبااار شلون لصغاااار ,, ومرى بعد اخويي استأذن مني وجااب قناع بيت ابويي وقال ليي حااولي تلبسينه ايااه والبسيه جدامه والله العظيم ظل يصرخ ما يبي يقعد ببيت ابويي !! واخويي مسكين اتفاجأ من ردة فعل قسوم وعلى طووووول ياخذة ويقصصه بالمقص ويقطه برى البيت حتى انه اخذه ووداه يراويه ايااه بالشارع !!

بنونة
بعد قلبي والله انتي
مشكورة وما قصرتين

وفعلا الاهم في المشكله ان شلون يروح الخوف من ولدي واذا على حمااتي عمرهاا كله بكله ما بتتعدل الحمد لله والشكر

ومثل ما قلتي خيوو ويمكن تقوين اني اباالغ اني سويت كل شي بس والله العظيم اني حتى شيخ وديته في شيخ بسترة وهو واااااجد زين ويمدحونه ووديااه عن الخوف طبعا ابوه الا وداه طبعا ابوه مقتنع ان قاسم يخااف وعنده عقدة خووف بس المو راضي يعترف ان اخته هي الا تسببت له بهذي العقده وان السبب الاول والاخير هو القنااع !!

ما علينا المهم اني وديته الى شيخ بسترة وعاين حالته وعطانا حروز اثنين وااحد يظل ويااه على طوول والثاني تحت وسادته وبعد عطانه ورقه مكتوب فيهاا ان نذبح دجااجة ونتصدق فيها الى فقراء

وفعلا سونا كل شي قال لينا عنه .. يمكن خف شوي بس الخوف لازال موجود وكل شي يخوفه !!

والطبيب النفسي فكرت فيهااا وكلمت زوجي ان نوديه بس ما شجعني وقال اذا تبين بنوديه بس ماايدش !! وما صار اني وديته ..

عصفورتنا الهادئه

ما يوحشش غالي حباابه
وانتين وحشتينا اكثر واكثر

ومشكورة وما قصرتين بعد عمري

والمشكله ان زوجي مو مقتنع ان السبب اهي اخته من جذي ما يخليهم وياايي يطلعون يوم الجمعه وخصوصا ان عماته يوم الا اطلع ويااهم يوم الجمعه دااايما يسالون عنهم ابوهم وينهم وليش ما خليتهم ويه الجهااال !! الصراحه والصراحه تنقال يمكن هم ما يكرهونهم بس ماادري ليش يخوفونهم

وطبعاا لانهم يسالون عنهم في غيابهم هو يقتنع انهم يحبونهم ويسالون عنهم وجذي .. ولهذا السبب هو مو مقتنع بفكرة اني اخذهم ونطلع يوم الجمعه .. وفي الفترى الاخيره اشوفه ياخذ الجهاال كلهم اولادي واولاد اخوانه ويطلع ويااهم الساحل وا الاسطبل الى في لبديع يعني شوي ارتاااح من لمراقب

وترى اني كلش كلش ماانزل يوم الجمعه اظل بشقتي زوجي يجيب لينا الغدى والعشى واني ماانزل مع ان نسوان حميااني يكونون موجودين بس اني كلش مااحب انزل وخصوصا اذا كانت حماتي الكبيرة موجوده

وصار ليهاا فترى بعد تجي كل اثنين يعني حتى يوم الاثنين من كل اسبوع بروح بيت ابويي !!

شقول وشخلي

الله كريم

ايات
مشكورة خيوو

وما قصرتين

وان شاء الله هالمرى بحااول اني اوديه الى علاج نفسي والله يشافيه

مشكورين اخوااتي كلكم ما قصرتيون كفيتون ووفيتوون

بس المشكله الحقيقيه هي اني شلون اخلي الخوف يروح عن ولدي ؟؟

الله يعينش يا ام عسول اني اقرء وقلبي محترق علةى قاسم حسيته هو ولدي ..كريه اذا كبر الخوف في الجاهل ...وسيطر عليه ....يعني اني حسين يخاف من بعض الاشياء بس مو خوف مكتسب بفعل حالة قاسم لا خوف طبيعي ....من بعض الاشياء مثلاا كان يخاف من الالعاب يموت ما يحرك ساااااااكن وهذا كان لانه ابوه ما يوديه الحدائق ابدااااااااااااااااااااااااااا ويوم شاف ولده جدي تصدقين قام يوديه الظهر حزة مافي احد رجعته من الشغل بس عشان يتعود وصدق راااح منه الخوف الحين ..ويمكن ما يتجرء في كل الالعاب بس ما يخاف ....ويصيح يقتل روحه من الصثياح ...ومثلاا الحيوااااااااااااانات ما يخاف منهم ابداااااااااااااا لا عصافير ولا قطاوة عادي يحبهم ويمعصهم ....

وصدق صعب التفكير في العلاج بس الله يعنيش ياخيو وحاولي بهدوء بروحش انتين ووياه وخطوة وخطوة ....
مثلاا ابتدي اشتري ليه قناع سبيايدرمان وقولي ليه هاي لك هدية مني !!
وخليه يرسم عليه وقولي ليه هذا ما يخوف لانه ما يقدر يسوي شي انته لا تخاف منه روح قصصه وااااااااجد واني وياك بعد بقصصه لانهك رجال ما تخاف وعطيه هدية واواعديه تكافئينه بشي يحبه عدل !!!
ولو اني منش صراحة بصير مجرمة مجرمة >>>>بس كتابة كله جدي اعرف روحي
خليه يشتري قناع هو يختاره وقولي ليه خوف اولاد عمتك !!! يستاهلون مدام امهم ما تراعي الجهال والله يساعدها على تفكيرها !!!قهرتني حدها الصراااااااااااحة!!!
والله يساعدكم وياريت اقدر افيدش خيتو والله جان شلت من همش وهم هالجهال لا تخلينه بروحه كلش ودائما حاولي تنسينه الخوف بشي ثاااني يعني المكان اللي يخاف منه حطي ليه شي يحبه ويستانس فيه او لعبة او فاجئيه بهدية في مكان يحس فيه بالخوف !!!

ام عسوووووووووول عورني قلبي على قصتج

والله في اوادم يقهرون وعديمين احساس
خيو انصحك ادا ما فاد فيهم الطيب روحي ليهم بالقوة
وحاولي خيو تنزعين الخوووف من قسسسوم هدا اهم شيء
وثاني شيء ليش ما تطلعوون انتي وزوجك يوم الجمعه ترحون تتغدون بمطعم بعدين تفترون بمجمع واشوي مشتريات وتلعبون الجهال لين ايجي الليل وترجعووون تعااااابه وتنااامون

والله يساعدج خيو

أم عسول

الله يعينش صدق

أني أقول السالفة يبي ليها دكتور نفسي عاجلا وليس آجلا

ومثل ما قالت ليش ندوي .. إذا شفتين هالقناع اخذيه وشققيه نتفة نتفة .. وإذا ما حصلتينه قولي لزوجش يا أني يا هالقناع في البيت .. خليه يجيبه من عندهم لو من تحت الأرض ..

أما على سالفة دلوع والا ما دلوع هذا حجي ما ينصرف .. قولي ليهم عاد هو دلوع لو ما دلوع بس أهم شي هالقناع تسبب له في عقدة نفسية ..

ولو أني منش والله أخاصمهم ولا أنزل ليهم ولا أنزل الجهال ليهم إذا هم مو راضين يتنازلون عن تصرفهم <_<

بما ان الموضوع ترفع مره ثانيه

بقول ليكم قصة ولدي وتقريبا بالضبط مثل قصة ام عسول ويه ولدها
اني ولدي عمره الحين قريب بكمل ال4 سنوات
هالسالفه صار ليها سنه وللحين الخوف فيه
عاد هو اللي مخوفنه ولد اخوي وعمره تقريبا 11 سنه
نفس الشي بقناع يخوف كانه وحش ونازل منه دم يعني صدق يخوف من قلب مره كنت اني فوق عند بيت اخوي وياي حمود وماجفنه الا ولد اخوي جاي ولابس هالوجه وتم ولدي اولشي متشنج مو عارف ويش اسوي وشفايفه زرقان ومتيبس اخدته وحضنته واحاول اهدئه مسكين بالغصب طلعت صرخته وتم يصرخ يصرخ حتى امي وابوي تحت سمعوه جو يتراكضون ويوم ابوي درى هاوشه ولافي فايده تمينا من نروح يقول ليه بجيب ليك الوجه واني احاول اني ما اهاوشه ماابيهم يقولون حاطه عقلها بعقل جهال بس بعد ولدي يعور قللبي
في يوم من الايام رحت فوق وجفته مفلوت شلته وجبته وياي البيت وراويته حمود وقدامه فلته في الخمام وشوي هدء بس بعد من يومها فوق ما يرضى يركب ليومنا هدا حتى اني حجرتي وحجرة اختي في بيت ابوي فوق واذا بنبيت هناك ما يرضى يركب اول ينام تحت وبعدين احمله اودي فوق ومن يقعد يجوف روحه فوق يستصرع
لدرجة ان اول ماصارت السالفه مرض ليه مرضه حمود صخن واستوى حالته حاله من يوم ثاني وهو نايم يتزهق بس اني ماقلت لزوجي لان لو قلت ليه بتصير سالفه

وهالايام طالع ليي بطلعه جديده
شاري ليه مسدس يطلع منه شرار وحمود يموت من الخوف من يجوفه عنده وبعد قام يسوي ليه نفس الحركه يخوفه به
وماني عارفه ويش اسوي وياه
اختي تقول ليي لين هالمره سوى ليه قدامش اخدي من عنده كسريه عشان يحتر على مسدسه وما يعودها يخوف الجاهل

الله يساعدش الصراحة ليش ماتاخدين اليه العاب نفس الي ياخدها ولد اخوش او مقاربه اليها عشان يتعود عليها ولا يخاف منها ويحس ان هي العاب تتكسر ماتخوف وشجعيه وراويه انها العاب موصدق وديه محلات العاب يختار اليه ؟ وهدا الي عندي ان شاء الله اكون فدتش

هلا اختي مرام

مشكوره
بس ترى نادرا لما اشتري ليه لعبه بروحي اكثر شي اني اوديه المحل وهو يختار الللي يبغيه
وحمود من النوع الللي يحب المسدسات واااجد بس من شاف هذا خاف منه وقلت ليه تبغي نفسه كنت في نفس المحل اللي ولد اخوي شاري منه واستصرع ليي عباله قاعده اخوفه ولا رضى اخده ليه خايف منه على قولته ما ابيه يطلع حريقه طفلي والاهل؟!!! 623830

الله يساعدكم صراحة على هالحركات الا تحر القلب..

ولو اني منش انجان عصبت على ولد اخوووي...

وخل يقولون حطيت عقلي بعقل جاهل..

ولدي خايف ومتصووورع وماحط عقلي بعقله..

زفيه زفة محترمة وقولي ليه ان كررت هالتصرفات مرة ثانية

بتشوف شي موزين ككك.. تهديد قوووووي..

عور قلبي حمدااان..

والله يعينش على هالازمة...

وبعد حمود باين عليه دلييييييع وخويف ههه

بس بعد مثل ماقالت مرام.. اخدي ليه مثل الالعاب

وراويه انها لعبة موصدق وانه ماتطلع حريقة ولا غيره..

بس شرار.. وبيفهم ..

وسلامتكم ..