مشكلتي هي زوجي

هلا فدائيات،شخباركم؟
بدش في الموضوع على طول وبقول مشكلتي اللي متعبتني واااجد وبقولها من البداية
اول ما انخطبت زوجي كان يقول ليي انه ماليه بسوالف البنات ولا يحب يحتك فيهم وانه من قبل لا يعرفني ماكان يعرف بنات فأني قلت اووه زوجي مافوقه فوق ،مرت ايام الخطوبة واني اكثر من مرة اذا اطلع وياه اشوف عيونه عالبنات لدرجة مرة كنا في السيارة وشفته فار راسه ورى يطالع بنية تمشي!! وكنت كل مرة اذا الاحظ هالشي اقول لا يمكن يتراوى ليي مو معقولة بسوي جدي وقدامي بعد!!
عاد مرة صارحته فتغير وجها وقال خلاص ببطل هالعادة وانه غلطان ويعترف بغلطه وساعات يقول ليي هذي مجرد نظرات لاتودي ولاتجيب،قلت ليه ولو مو عدلة تسوي جدي
وحسيته من بعدها تغير او يمكن اني اللي يتراوى ليي انه تغير،عقب فترة صرت من اطلع وياه اشوف عيونه عالبنات وخصوصا اذا يشوف وحدة مو متحجبة وفاله شعرها وكنت اكلمه بعد ويقول انا مو وعدتش اني بتغير ،خلاص انا اتغيرت اقوليه اني متأكدة عيونك عليهم يقول لا كنت اطالع شي ثاني ،اكثر من مرة يصيدني هالشي واسكت بس ساعات ماقدر لازم اتكلم لان لمتى بظل جدي؟
اخر مرة كنا رايجين مجمع وكانت وحدة حاسر تمشي اشوف شلون عيونه تلاحقها ومرة كنت اكلمه شفته يطالع شي ،لما وجهت نظري للشي اللي يطالعه شفت ان نظره موجه للبنية عاد سيدة خفست وجهي ومشيت هو حس ان فيني شي لما ركبنا السيارة اصر يعرف شنو فيني واني سكت لمن اصر واصر فقلت ليه،عصب وقال على اخر ايامي سويتيني اطالع بنات وما استحي وانه قصده يطالع شي مسوين عليه ديسكاونت وهو قاعد يطالع سعره ويقول انتين غلطتين عليي وجرحتيني
هذي مشكلة والمشكلة الثانية انه ساعات يفتح ليي موضوع كلش ما اتقبله يمكن يكون عن مزاح بس مادري ليش من يقوله ليي اعصب !!هو موضوع الزواج بثانية يعني خصوصا هالفترة احسه مقتنع بسالفة الزواج بثانية يعني مثلا مرة كنا وية وحدة من نسباته كانت تقول ان فلان تزوج على مرته ما شفته الا يدافع ويقول الشرع حلل 4 مافيها شي اذا تزوج الثانية حدي استغربت من ردة فعله
عاد بعدين فتحت الموضوع بينا الا يقول اي شفيها وهو يضحك اخر شي قلت ليه لاتفتح هالموضوع ويايي فقام يضحك وسكت
من جم يوم يقول ليي انه كان يتمازح وية واحد ويقول ليه يلا خله نعرس في ليلة عاد اني عصبت اقول ليه ويش هالحجي يقول وش فيها؟ عادي الشرع حلل 4 وامس حددده قهرني اقوليه خاطرنا في معاريس يقول نطريني اذا عرست بعزمش اقوليه ويش هالحجي قام يضحك يقول شدراني فيش تقولين ليي انا خاطرش في معاريس
والمشكلة الاكبر صايرين اذا نتزاعل او تصير ببينا مشكلة سيدة يجي في باله هالشي ومرة كان يبي مني شي واني قلت ليه تعبانة عصب وتخيلو شنو قال؟قال انا اقدر اجيب وحدة من الشارع هني ويحصل منها اللي يبيه
كلامه بين فترة والثانية يجي في بالي

خيوو الله يساعدش

صدق كلامه يقهر ويبط الجبد ويتعب النفسية



حتى لو عن مزح

المرة بطبيعتها حساسة واقل كلمة تتحسس منها

المفروض يحاسب لتصرفاته وكلامه وياش

....

نصيحتي لش خيوو

انش ما تستسلمين ابدا

بالعكس رتبي روحش ولبسي وسوي شعرش وتمكيجي له على طول

لان زوجش شكله يحب يشوف البنت المتعدلة والمتهندمة من مجاميعه

تعدلي ليه وسمعيه كلام حلو وخليه ما يشوف غيرش في هالدنيا

بعدين شوي شوي بتحسين انه البنات الا بالشارع ما يلفتون نظره

والله يهدي رجلش

هلا خيو مثل ماقالت ليش الاخت مجهولة حتى لو امزاح الوحدة تنقهر والله يكو ن في عونكواني بعد زوجي دايما يقول خاطرو في وحدة واني انقهر بس فهمت اليه يبي يقهرني وافي رجال مايطالع لو يطالع خلة يطالع المهم اتكونين واثقة من نفسك دايما اتجملي ليه وكشخي اليه علشان اتكوني في نظرة حلوة والله يهدي زوجش ولزواج كلهموزوجي لحد الحين يقول يبي الثانية والرابعة بس ماعلي منه اخلي اعصابي في ماي باردةولا شني اسمعة والحمد الله عايشين

خيووو مشكورة على الرد
على فكرة هو كله يقول ليي انه مايحب المكياج ومايبيني احط مكياج بس اذا احط يعجبه
ذكرتيني بشي بعد ،اذا اشوفه يطالع بنات يحز في خاطري وبعدين اقوليه (اني ما اعجبك)يقول لو ماتعجبيني جان ما اخدتش،بس انا مو من النوع اللي يمدح ويقول كلام حليو،اقوليه معقولة تشوف شي يعجبك وماتقول عجبني يقول اي انا جدي ساعات اشوف شي يعجبني بس اسكت

خيو شرايش اصارحه بالمشكلة الثانية واقوليه اللي في قلبي بس خايفة اذا صارحته ينقلب الشي عليي وبالعكس يحط السالفة في راسه صدق

محتارة وفي نفس الوقت حدي مضايقة

bigmista
كتبتين نفس نكي،مشكورة خيو على ردش
تتوقعين اني واجد حساسة ومكبرة الموضوع؟يعني عادي الرجال يقول لوزوجته جدي وتمر السالفة عادي؟

الله يساعدش خيوو

صدق مشكلتش صعبة شوي

هو يعني الانسان ما يقدر يغير روحه في يوم وليلة

صدق انه قال لش خلاص رح يتغير

لكن الانسان اذا فيه طبع صعب ان يغيره بسهولة

فهو يحتاج الى وقت علشان يغير من طبعه

وانتي بعد حاولي تتساعدين وياه وتصبرين عليه وتساعدينه لكي يتركه

حاولي بين كل فترة وفترة تذكرينه بالاحاديث والقرآن

عن غظ البصر وحاولي ما تتطلعين وياه في الاماكن الا تحسين فيها بنات يلفتون النظر

يعني اذا تبون تروحون مجمع روحوا في الفترة الصباحية بحيث يكون المكان هادئ

واذا سولف وياش عن الزواج من ثانية قولي ليه اذا تبي تتزوج تزوج

بس حط ببالك اني مالي قعدة وياك بعد

تحمليه شوي .. يمكن هو يبي يعدل من روحه بس مو عارف

تقدرين بعد تاخدين ليه كاسيت تحطينه بالسيارة فيه محاظرة عن غظ البصر او تعدد الزوجات

واذا كنتي مو وياه راح يسمعه وان شاء الله يرشده الى الطريق الصحيح

بس هذا الا عندي وان شاء الله الاخوات يقدرون يفيدونش اكثر

خيو فكرتش حليوة بس صراحة صعب اسويها ما احسه بيتقبلها لان اني اولدري متكلمة وياه في هالموضوع وبقول ليي وش قصدش بهالكاسيت

الله يكون بالعون***

خيو لا تحطين بالش لهي الموضوع معظم الرجال يلفتهم النساء الي في الشارع هي بسبة الفضول والنظرات مهما كانت تكون عابرة ولا تحطين ببالش انه يبي يغازل احنا ساعات بنات من كثر الي يمصخونها بنات هالزمن نتطلعهم ويلفتون انتباهنا مابالش رجال ؟!! لا تقولين قيم ومبادئ هو في باله ماسوي شي حرام ونظراتي عبارة هي طبيعة كل الرجال


يعني حطي في بطنش بطيخة صيفي مثل ماوحدة ساعات تشوف رجال مهندم ومزقرت وعطره واصل لين اخر الشارع مثل الشي راح تطلعه واذا تطلعته هل معناها انها راح تروح ليه لو راح تسوي شي غلط بنظراتها مجرد شوف عين لانه العين تهوى ماهو جميل


يعني انتي لو مهما بالغتي في التجمل اكيد في الطلعات مابتتجملي بتكلف ولا راح تنزعي الحجاب من عليك


نصيحتي لك صيري مثل هالبنات في البيت يعني حتى لبسي عباة في بيتش وفلي الشعر كانه انتي طالعة بره وشوفي ردة فعله اكيد راح تعجبه


وعن زواج الثانية كل الرجال يدرون انه هالموضوع يستفز نسوانهم هع من جذي يتعمدون انه يفتحونه ويدافعون عن الرجال الي يعرسون فلا تحطين في بالش مدام هو هالشي عاجبنه اكيد بيعرس !!


شكلش متزوجة حديثا يعني مب من زمان هي اشياء كلش عابرة ومشي حياتش مافي انسان كامل بالدنيا حتى انتي مب كاملة صح الكمال لله والعظمة

صج والله قهر انا بعد زوجي وايد يطالع البنات وانا اقولها تخيلي بدرجه مره ظربت ع يده بقوه في مجمع يوم شفته يطالع في وحده شوي يدخل فيها وهي متبرجه وجسمها مفصل كم مره اتكلم معاه اقوله انت ما شايف خير ليش انا مب ماليه عينك يقولي لو طالعتها اش يصير تصير فيها حفره وانا ملبسنس نقاب تدرين اش سويت خلعت نقاب ويوم اطلع معاه اتكشخ واحط مكياج والله غصب ولما اطلع معاه احد يطالعني ينقهر ويهاوشني البسي نقاب اقولها حلال عليك تطالع خلاص خلي غيرك يطالعني مب انت تقول ما بيصير حفر لو اطالع انا بعد لو طالعوني ما راح بصير لي حفره فهو طول الوقت خايف احد يطالعني فكرتي شوي انجحت قلت له لو بطلت تتطالع راح البس نقاب . بس مافي فايده وانا لين يومج ما لبسته خليه ع هوى بس والله قهر ما نقصني شي كل شي اسويله اتكشخ والبس بس رجاجيل ما يمل عينهم الا تراب


وعن سيرت زوجه الثانيه فماشاء الله من بعد شهر من زواجي قالها لي بالمزح قالي يوم اتملل منج بتزوج غيرج واحطكم مع بعض تدرين اش قلت له لاني انقهرت ومن قالك بقعد معاك بتملل مني بتتزوج غيري خلاص انا بعد بغير بتركك وبتوج غيرك مثل ما تبي تغير بغير ومن قال اني بقعد مع واحد بتملل مني اقولج تغير وجه قالي شنو هل كلام اذا انا اقول عادي رجال بلحلال بتزوج وقلت له انا متى قلت انا بتزوج بالحرام تزوجت غيري بطلق وباخذ غيرك ناقصني شي يد ولا رجل انقهر خخخخخخ بس فديته ما اقدر بس ابي اقهره لانه قهرني وربي احبه موووت ربي يهديه ويخلي لي زوجي ويكون شريكي في دنيا والاخره