مشكلتي مع خطيبي

سلام شخباركم ارجوكم ساعدوني وجزاكم الله الف

صار لي من الخطوبه 5 شهور وخطيبي لا يتصل بي ولا يسأل عني اذا جاء لي كل ساكت ولا يتكلم معي ولا يتقرب مني
ولا يبادر شعور ولا يطلع معي مع العلم انه منفصل من قبل ساعدوني ارجوكم ماذا افعل معاه

الله يساعدش خيو

يمكن خطيبك من النوع الهادئ الساكت

بس انتي بادري شوي شويه معاه

لمه تبين شي تروحين تسوقين ،، انتي قولي له يوديج

وشوي شويه يمكن يرتاح اكثر

هالقصة يبى ليها أم فطوم وزنوب

السلام عليكم اختي

واضح انه الشاب خجول نوعا مااا ونتيجة الى انفصاله هو مخلي حاجز مابينكم عشان لا يطب في نفس مشكلة الانفصال الاولية !!!

هي اول نقطة ثاني نقطة انتي تقربي ليه بس بحدود لاتخلينه يحس بالخجل منش يعني في حدود المعقول

كثفي تقربش منه واتصالاتش ليه حتى لو مارد عليش هو الحين قاعد يتخبط بين الماضي والمستقبل وانتي لازم توضحي ليه الطريق الصح وانه انتي راح تستمري معاه وارسمي خطط المستقبل معااه وشلون راح تكون حياتكم لما تتزوجون


لااا تكوني في هي الفترة الزوجة لااااااااااااااااااااااااااا نسيه كوني الصديقة وخليه يفتح قلبه ليش !!!

حتى لو انجرحتي من تفكيره ومن شعوره اتجاهك بس اهم شي تفهمي شنو الي يدور في باله بالضبط هي مب بس حياته هي حاتش انتي بعد طبعاا لااا تتهورين وتفكرين بالانفصال انتي دوري النقاط الايجابيه فيه

وفي الفترة الي يكون فيها بعيد عنش ومايسال انتي بتضايقي اكيد وتمري بتازم نفسي لازم خلاله تفكرين في حل وطرق جذب واهم شي انش ماتوصلين خبر الى اهلش او اهله بالي صاير بينكم

حسسيه باهمية وجوده عندش وانش محتاجه ليه وانش تحبينه !!! حتى لو انش تحسين انه مب متعلق فيش انتي الي علقيه فيش هي النوع مايحبذ التلصق والانجذاب الجسدي لااا يبي اول يحب عشان يفكر في هي لاشي الي هو التقرب منش

يعني هو حالياا يمكن يحبش بس مب متعلق فيش فهمتي علي شلوون !!

طبعي اشياء من النت وخليه يقراها عن تعامل الزوج مع زوجته او تقدري تخليه يقراء كتاب تحفة العروس هي مب نسائي فقط يعني يقدر يقراه وانتي بعد حاولي انش تخلين معاملتش معاه مرنة الى درجة انه حتى لو حسيتي من كلامة بجرح طنشي وحسسي روحش انش تكلمين صديق او حتى اخ تبين انش بس تساعدينه عشان يتخطى هي المرحلة

بين ليه انش عارفة انه في مرحلة تخبط وارشديه الى الطريق الصحيح عطيه ايجابيات الزواج والزوجة الصالحة شلون يكون تعامله مع الزوج

اختي انشاء الله يكون الكلام الي قلته يفيدش خيوو واو بالاحرى تفهمي علي لانه احس كلامي مخربط خخخ

بس والله حاسة فيش وانشاء الله ياربي يجمع بينكم على الخير والصلاح ويهديه وتكوني ماي عينه

والاهم هو الدعاااء لانه مفتاح لكل مشكلة


والله يوقفش وتسمعينا الاخبار الزينة

الله يهديه يارب .. زحمة اذا كان الشخص منفصل من قبل .. بس حاولي تتقربي ليه اكثر حاولي تعرفي الاسباب ..

والاخت ام فطوم وزنوب ما قصرت بردهااا ..

خيو من رأيي لا تسوين مثل ما قالت ملاذ وتعطينه أمثلة عن المخطوبين لأن أولاً الرجال ما يحب يقارن بغيره وهالشي قد يولد ردة فعل عنده وأني اتفق ويا أم فطوم وزنوب واعتبري روحش إنش تبغين تكسبينه
ولاتقولين ما تقدرين
لأن اللي في الشوارع واللي يلاحقون الرجال ويخلون يفكر فيهم عقب ما كان مو شايفنهم كلش وبالحرام مو أشطر منش وانتين دافعش حلال
خلي لنفسش تحدي وفكري في إيجابية لازم أكسب زوجي
وبيكون إنجازش كبير إن شاء الله